Nos Aymo, Dei gratia Matisconensis ecclesiæ minister humilis, omnibus notum facimus præsentes litteras inspecturis, quod nobilis mulier domina Beatrix de Laye, uxor quondam Bartholomei de Clusa, militis, et Humbertus de Minciaco, nepos ejusdem dominæ, in nostra præsentia constituti, confessi sunt se spontanee et pro utilitate sua vendidisse viris religiosis Hugoni, abbati, et conventui Cluniacensi, precio viginti librarum Cluniacensium, partem decimæ et omnia quæ habebant in parrochia de Marziaco juxta Cluniacum, et quicquid habebant tam in prædicta parrochia quam in illa de Lorduno sive de Cota, tam in denariis annuis debitalibus reddendis, serviciis, juribus, hominibus, nemoribus, aquarum decursibus, quam etiam omnibus aliis modis habere poterant, et etiam duos solidos Cluniacenses debitales in parrochia de Brey existentes et super hiis omnibus eisdem religiosis pacem jurasse perpetuo tenendam sunt confessi, ac de omni damno et evictione se ipsis super hoc fideliter obligasse et de totali precio sibi in numerata pecunia ab eisdem religiosis satisfactum fuisse; renunciantes super hoc expresse omni exceptioni juris tam civilis quam canonici eisdem competenti vel deinceps competituro. In cujus rei testimonium, ad preces prædictorum Beatricis et Humberti de Minciaco, nepotis ejus, præsentibus litteris sigillum nostrum duximus apponendum. Actum anno gratiæ M^o CC^o tricesimo sexto, mense marcio.